Moderatori i njohur amerikan Ryan Seacrest ka tërhequr vëmendjen e mediave dhe rrjeteve sociale pas një daljeje të fundit publike në Los Angeles, ku u paraqit në eventin bamirës Taste For A Cure Gala në mbështetje të Jonsson Cancer Center Foundation në UCLA.
Në pamjet e shpërndara nga eventi, shumë fansa vunë re ndryshime në dukjen e tij, duke e përshkruar si “pothuajse të panjohshëm”. Në rrjete sociale nisën menjëherë komentet dhe spekulimet, ku disa përdorues ngritën dyshime për ndërhyrje estetike, si lifting i fytyrës apo i syve, ndërsa të tjerë u fokusuan te humbja e dukshme e peshës.
Një pjesë e komentuesve shprehën shqetësim për gjendjen e tij fizike, duke e cilësuar si “tepër të dobët” dhe “të rraskapitur”, duke vënë në dukje faqe më të rëna dhe një dukje më kockore se më parë. Këto reagime ndezën debat nëse ndryshimi lidhet me stilin e jetesës apo me mbingarkesën në punë.
Seacrest, nga ana e tij, ka deklaruar më herët se ndjek një regjim të rregullt ushqimor me dietë mesdhetare dhe ushtrime fizike si pilates dhe stërvitje force, duke mohuar çdo problem shëndetësor.
Sipas një burimi anonim të cituar në media, ai thuhet se është “i mbingarkuar me punë” dhe vazhdimisht i lodhur, pasi drejton disa projekte njëkohësisht, përfshirë American Idol, Wheel of Fortune dhe emisionin radiofonik American Top 40.
Në jetën personale, Seacrest u nda së fundmi nga modelja Aubrey Paige dhe ka bërë shaka publikisht se mund të kërkojë dashurinë në platforma takimesh online.
