Teksa Botërori i këtij viti po afrohet, debatet rreth çmimeve të biletave po marrin gjithnjë e më shumë vëmendje, me kritika të forta që po vijnë si nga tifozët, ashtu edhe nga figura të njohura politike. Së fundmi, edhe presidenti amerikan Donald Trump ka reaguar ashpër ndaj kostove të larta, duke i cilësuar ato të papërshtatshme, sidomos për një pjesë të gjerë të qytetarëve amerikanë.
Në një intervistë telefonike për “New York Post”, Trump u shpreh i habitur nga shifrat që po qarkullojnë për ndeshjen hapëse mes SHBA dhe Paraguajit, e cila do të luhet në SoFi Stadium të Los Angeles më 12 qershor. Çmimet e biletave për këtë takim nisin nga rreth 1000 dollarë, një shifër që ka ngjallur reagime të shumta.
“Nuk isha në dijeni të asaj shifre. Do të më pëlqente të isha, por të them të vërtetën, as unë nuk do ta paguaja atë shifër-tha kreu i Shtëpisë së Bardhë në një intervistë telefonike për New York Post.”
Ai shtoi se ende nuk e kishte marrë plotësisht informacionin për këtë çështje, por se do ta shqyrtonte më nga afër situatën.
“Nuk e kam marrë ende lajmin, por do të duhet të hedh një sy-tha presidenti Trump që u shpreh i zhgënjyer nga fakti që klasa punëtore amerikane që përbën një pjesë të bazës së tij elektorale, të mos mund të ketë mundësinë të ndjekë ndeshjet e Botërorit për shkak të çmimeve të papërballueshme.”
Në të njëjtën linjë, Trump theksoi edhe zhgënjimin e tij personal për përjashtimin ekonomik të një pjese të tifozëve.
“Do të më pëlqente që njerëzit që kanë votuar për mua të kishin mundësinë që të ishin-tha Trump që nënvizoi se gjithsesi Botërori po rezulton një sukses i jashtëzakonshëm.”
