Ndërsa femrat janë ato që e kanë më shumë “tensionin” se çfarë do të veshin natën e fundvitit edhe meshkujt duhet të dinë disa këshilla.
Por a e keni vendosur se ku do ta kaloni natën kur ndërrohen vitet? Ju pyesim sepse është e rëndësishme të dini ambientin apo eventin në të cilin ndodheni. Look-u më i përshtatshëm është ai eleganti: xhaketa dhe pantallonat janë të këshilluara, por jo gjithmonë është e nevojshme të vishni këmishë.
Kjo do të thotë se në rastet pak a shumë jo formale, mund ta harroni këmishën e në vend të saj të zgjidhni një pulovër me jakë të mbyllur. Kur situata bëhet më “chic”, duhet të jeni super formalë dhe shumë elegantë.
Gjatë periudhës së festave kthehet në modë kadifja, një copë e fisme, e përshtatshme për rastin tuaj. Për të dalë një darkë me miqtë, mund të visheni me kadife.
Xhaketa është gjithmonë zgjedhja më e mirë. Mund ta kombinoni me pantallona xhins të errëta e bluza të mbyllura prej leshi të hollë. Për darkat e rëndësishme, më mirë komplet kadife.
Palltoja është një nga veshjet më të rëndësishme të festave të fundvitit. Për më tepër që bën ftohtë në këtë periudhë. Për darkat jo formale me miqtë, mund të zgjidhni një model klasik dopiopet, kurse për situatat më formale, një model të gjatë deri tek gjunjët, jo më poshtë.
Për rastet akoma më sportive, pranohen dhe pulovrat e trasha, sidomos po të keni një trup të tonifikuar.
Në fund, dhurojini vetes aksesorë, si kapele borsalino apo doreza lëkure, të cilat kur janë të kombinuara mirë, do t’ju bëjnë të dukeni edhe më me stil.
