Taylor Swift ka reflektuar mbi fillimet e saj në muzikë dhe mënyrën si emocionet e forta të adoleshencës kanë ndikuar në krijimin e disa prej hiteve më të mëdha të karrierës.
Në një intervistë për The New York Times Magazine, këngëtarja 36-vjeçare, e renditur mes 30 kantautorëve më të mëdhenj amerikanë në jetë, tregoi se pasioni dhe ndjenjat e forta kanë qenë shtysa kryesore në procesin e saj krijues që në moshë të hershme.
Swift, e cila ka nisur të shkruajë këngë që në moshën 12-vjeçare, kujton një moment kyç në jetën e saj artistike kur vendosi të mos shqetësohej më për mendimin e të tjerëve. Sipas saj, kjo ndodhi kur shkroi hitin “Love Story” në moshën 17-vjeçare, ndërsa ishte e mërzitur me prindërit që nuk e lejuan të dilte në një takim.
Ajo e përshkruan atë periudhë si një kohë kur ndjenjat përjetohen me intensitet të lartë, duke ndikuar drejtpërdrejt në mënyrën si rrëfehen historitë në muzikë. “Kur je i ri, përjeton gjithçka në mënyrë shumë të detajuar dhe të thellë”, u shpreh Swift, duke shtuar se kjo vëmendje ndaj detajeve ka mbetur pjesë e stilit të saj edhe sot.
Artistja theksoi gjithashtu se suksesi i saj lidhet me sinqeritetin në krijim, duke shkruar atë që ndjen në çdo fazë të jetës, pa u ndikuar nga pritshmëritë e publikut.
Ndërkohë, ajo përmendi edhe albumin “Reputation”, për të cilin tha se, pavarësisht kritikave, mbetet një nga projektet që e ka dashur më shumë, duke dëshmuar se besimi në artin e saj ka qenë gjithmonë prioritet.
