Me kalimin e viteve, trupi i njeriut pëson ndryshime të natyrshme që ndikojnë edhe në sistemin imunitar. Sipas Dr. Natalie Riddell, eksperte në imunologji dhe plakje, mbrojtja natyrale e organizmit nuk dobësohet papritur, por përkeqësohet gradualisht, duke e bërë trupin më të ndjeshëm ndaj infeksioneve dhe më të ngadalshëm në rikuperim.
Ajo shpjegon se në moshë të re, sistemi imunitar reagon shpejt ndaj virozave dhe plagët shërohen më lehtë. Me kalimin e viteve, ky proces ngadalësohet për shkak të uljes së qelizave T, të cilat janë thelbësore për luftimin e viruseve dhe qelizave të dëmtuara. Sipas saj, edhe gjëndra që prodhon këto qeliza zvogëlohet me kalimin e kohës, duke ndikuar direkt në forcën mbrojtëse të trupit.
Një tjetër ndryshim është ulja e cilësisë së antitrupave, që e bën organizmin më pak efikas në njohjen dhe neutralizimin e infeksioneve. Po ashtu, rritet inflamacioni kronik, i njohur si “inflamaging”, i lidhur me sëmundje si diabeti, problemet kardiovaskulare dhe demenca.
Megjithatë, ekspertët theksojnë se këto ndryshime mund të ngadalësohen me stil jete të shëndetshëm. Aktiviteti fizik i rregullt, gjumi cilësor dhe menaxhimi i stresit luajnë rol të rëndësishëm në ruajtjen e imunitetit. Edhe dieta mesdhetare, e pasur me fruta, perime dhe yndyra të shëndetshme, ndihmon në uljen e inflamacionit.
Sipas Riddell, edhe shëndeti i zorrëve dhe mikrobioma ndikojnë drejtpërdrejt në forcën e mbrojtjes natyrale, duke e bërë ushqimin dhe stilin e jetesës faktorë kyç në plakjen e shëndetshme të organizmit.
