Një aksident i rëndë ajror është regjistruar në Sudanin e Jugut, ku një avion i vogël është rrëzuar në jugperëndim të kryeqytetit Juba, duke shkaktuar vdekjen e të gjithë personave që ndodheshin në bord.
Sipas Autoritetit të Aviacionit Civil, avioni tip Cessna 208 Caravan, i operuar nga kompania CityLink Aviation, humbi kontaktin me kullën e kontrollit gjatë fluturimit nga Yei drejt Aeroportit Ndërkombëtar të Jubës. Fluturimi kishte nisur në orën 9:15 të mëngjesit sipas orës lokale, ndërsa komunikimi u ndërpre rreth orës 9:43, pa asnjë sinjal të mëtejshëm emergjence.
Në bord ndodheshin gjithsej 14 persona, përfshirë pilotin dhe 13 pasagjerë. Autoritetet kanë konfirmuar se mes viktimave janë edhe dy shtetas kenianë, ndërsa pjesa tjetër janë qytetarë të Sudanit të Jugut.
Ekipet e emergjencës janë angazhuar menjëherë në vendin e ngjarjes, në një zonë të vështirë për t’u aksesuar, duke nisur operacionet për kërkim-shpëtim dhe mbledhjen e provave. Deri më tani, nuk ka të mbijetuar.
Autoritetet e aviacionit kanë deklaruar se hetimet paraprake po fokusohen te kushtet atmosferike, pasi dyshohet se dukshmëria e ulët dhe moti i keq mund të kenë luajtur rol në rrëzimin e avionit. Megjithatë, nuk përjashtohen as shkaqe të tjera teknike, të cilat do të analizohen nga ekspertët përkatës.
Ngjarja ka tronditur opinionin publik në vend, ndërsa pritet një raport i detajuar zyrtar për të zbardhur plotësisht rrethanat e këtij aksidenti tragjik.
