Andy Robertson është drejt largimit nga Liverpool në fund të sezonit, duke e konfirmuar vetë vendimin përmes një postimi në rrjetet sociale. Mbrojtësi skocez ndjek kështu rrugën e Mohamed Salah, i cili më herët kishte paralajmëruar një largim të mundshëm nga “The Reds”.
“Dhashë shpirtin dhe zemrën, nuk kam pendesa. Në këto vite jam rritur si njeri. Liverpool dhe tifozët e tij do të jenë gjithmonë gjithçka për mua”, shkroi Robertson, ndërsa vetë klubi e përshkroi largimin e tij me fjalët: “Do të largohet si një legjendë”.
I lindur në vitin 1994, Robertson ka qenë një nga figurat kyçe të suksesit të Liverpool-it në vitet e fundit. Ai numëron 31 paraqitje këtë sezon në të gjitha kompeticionet dhe në palmaresin e tij përfshihen 2 tituj të Premier League, 1 Ligë Kampionesh, 1 Superkupë Europe dhe 1 Botëror Klubesh.
Me kontratën drejt fundit dhe si lojtar i lirë, Robertson ka tërhequr interes të madh në merkato. Në Angli, Tottenham shihet si favorit, ndërsa në Skoci interes ka nga Celtic dhe Rangers. Në Itali, Milani po monitoron situatën, duke e konsideruar një opsion ideal për skemën 4-3-3.
Eksperienca dhe cilësitë taktike të Robertson mund të jenë një vlerë e shtuar për skuadrën italiane, ndërsa ardhja e tij do të ndihmonte edhe në zhvillimin e lojtarëve të rinj. Megjithatë, për momentin Tottenham mbetet në avantazh në garën për shërbimet e mbrojtësit skocez.
