Kriminelët shqiptarë, përfshirë edhe ata që kanë mbërritur në Britaninë e Madhe me varka të vogla, po dënohen me një ritëm prej rreth një personi çdo dy ditë.
Gjatë tre muajve të parë të vitit, rreth 63 shtetas shqiptarë janë dënuar me gjithsej 207 vite burg. Aktualisht, shqiptarët përbëjnë rreth 9 për qind të të burgosurve në burgjet britanike, duke qenë grupi më i madh i shtetasve të huaj në burgjet e Anglisë dhe Uellsit, raporton The Telegraph.
Shumë prej tyre dyshohet se kanë hyrë ilegalisht në Britani duke kaluar Kanalin Anglez. Pas shqiptarëve renditen shtetasit irlandezë dhe polakë, secili me rreth 7 për qind të të burgosurve të huaj.
Veprat penale më të zakonshme përfshijnë trafikun e drogës dhe vjedhjet, megjithëse ka edhe raste të rënda, si ai i një personi të dënuar për vrasjen e foshnjës së tij tre muajshe.
Kostoja për mbajtjen e një të burgosuri arrin në rreth 60 mijë paund në vit për taksapaguesit britanikë, çka mund të shkojë në afro 800 milionë paund nëse të gjithë të dënuarit vuajnë plotësisht dënimet e tyre.
Rritja e numrit të shqiptarëve në burgje lidhet me valën e mbërritjeve me varka të vogla në vitin 2022, kur mbi 12 mijë shqiptarë hynë në Britani. Sipas autoriteteve britanike, shumë prej tyre janë përfshirë në ekonominë informale ose në rrjete kriminale, duke dërguar shuma të mëdha parash në Shqipëri.
Ndër rastet e fundit janë edhe dy vëllezër shqiptarë të dënuar për shpërndarje kokaine, si dhe një 19-vjeçar i kapur me armë të modifikuara dhe prova të kultivimit të kanabisit.
Autoritetet britanike theksojnë se të huajt e dënuar me mbi 12 muaj burg përballen automatikisht me dëbim. Ndërkohë, ligjet e reja synojnë përshpejtimin e deportimeve, duke lejuar kthimin e disa të dënuarve që pas shpalljes së fajësisë.
Qeveria britanike ka intensifikuar gjithashtu fluturimet e deportimit drejt Shqipërisë, të cilat tashmë kryhen pothuajse çdo javë.
