Kosova është vetëm një fitoreje larg ëndrrës së madhe për kualifikimin në Botëror. Dardanët presin në “Fadil Vokrri” Turqinë, në finalen e “play off”.
Pas eliminimit të Sllovakisë, tashmë djemtë e drejtuar nga Franco Foda, kanë mundësinë të bëjnë historinë, duke u kualifikuar në një Kupë Bote. Pak minuta para fillimit, janë zbuluar edhe formacionet zyrtare, me të cilat dy përfaqësueset do të zbresin në fushë.
Formacioni zyrtar i Kosovës:
Kosova: Muric, Dellova, Hajrizi, Hajdari, Gallapeni, Vojvoda, Hoxha, Rexhbecaj, Muslija, Asllani, Muriqi.
Sytë e të gjithë shqiptarëve janë sot në stadiumin ‘Fadil Vokrri’ të Prishtinës, aty ku në orën 20:45 nis finalja play-off mes Kosovës dhe Turqisë. Ndeshja teke do vendos se cila mes dy skuadrave do jetë pjesë e Grupit D të Botërorit. Vetëm dhjetë vite pas pranimit në FIFA dhe UEFA, Kosova sheh një nga arritjet më të mëdha në futboll, teksa grupet e Kupës së Botës do ishin realizimi i një ëndrre të kahershme për ‘Dardanët’.
Ekipi i Franco Fodës mposhti 3-4 Sllovakinë pesë ditë më parë në Bratislavë, aty ku ra në sy loja sulmuese. Sot përballë është Turqia, një ekip që prej vitit 2002 nuk merr pjesë në Botëror, teksa në Japoni dhe Kore të Jugut u renditën të tretët në botë.
Kosova do ketë një mbështetje të madhe sot, ndërsa stadiumi “Fadil Vokrri” duket shumë i vogël për kërkesat e shumta për bileta. Diçka më pak se 14 mijë tifozë do jenë në stadium, ndërsa 700 prej tyre janë nga Turqia. Edhe pse pa bileta, mijëra tifozë kanë udhëtuar edhe nga Shqipëria drejt Prishtinës, duke treguar një mbështetje për vëllezërit që mund të shkruajnë historinë.
