Ish-banorja e “Big Brother VIP 5”, Nikol, ishte e ftuar ditën e sotme në “Fan Club”, ku ka folur hapur për raportin e saj me të ëmën dhe për letrën që kjo e fundit i ka dërguar për programin.
E pyetur nga moderatoria Kiara Tito, ndërsa ajo e ka parë letrën që mamaja e saj ka dërguar për “Fan Club”, Nikol është shprehur se e ka dëgjuar vetëm një pjesë të saj, por nuk e ka parë plotësisht në ekran, pasi kjo ishte pjesë e lojës të mosreagimeve nga “Vëllai i Madh”. Ajo shtoi se nuk ka për t’i thënë asgjë të ëmës dhe se do i japë kohë vetes për një takim eventual me të.
“Kam dëgjuar vetëm një pjesë të letrës, nuk e kam parë fare në ekran letrën, se ka qenë pjesë e lojës të mosreagimeve dhe kjo ka qenë e papritur për mua. Ajo që unë kam treguar edhe brenda shtëpisë të Big Brother, edhe vendos ta mbaj me aq sa jam shprehur në Big Brother, edhe për pjesën e letrës duhet ta analizoj më shumë. Unë e kam falur, edhe për të komunikim do e zgjidh me veten, do i jap vetes time kohë, edhe më pas do e vendos. Unë s’kam asgjë për t’i thënë”, tha Nikol.
Gjatë intervistës, ish-banorja tregoi se marrëdhënia me të ëmën është një çështje personale, të cilën preferon ta menaxhojë me kujdes dhe pa ngutje. Ajo theksoi se çdo vendim për një komunikim më të thellë do të merret pas një reflektimi të plotë dhe vetëm kur ndihet e gatshme.
