Një ngjarje shqetësuese është regjistruar në spitalin rajonal të Korçës, ku në repartin e pediatrisë është paraqitur një foshnjë rreth dy muajshe në gjendje shumë të rëndë shëndetësore.
Sipas burimeve konfidenciale nga policia dhe stafi mjekësor, gjendja e foshnjës paraqitet kritike dhe mjekët po bëjnë përpjekje intensive për ta stabilizuar. Dyshohet se gjendja e rënduar mund të jetë shkaktuar nga kequshqyerja, megjithëse hetimet janë ende në vijim për të përcaktuar rrethanat e sakta.
Mësohet se foshnja kishte lindur rreth dy muaj më parë në muajin e shtatë të shtatzënisë, pra prematurë. Pas lindjes ajo ishte trajtuar fillimisht në spitalin e Korçës dhe më pas ishte transferuar për kujdes më të specializuar në Tiranë, nga ku kishte dalë në gjendje të mirë shëndetësore.
Megjithatë, pas kthimit në shtëpi situata duket se është përkeqësuar ndjeshëm. Sipas burimeve, foshnja ka shfaqur probleme serioze shëndetësore që kanë bërë të nevojshme rikthimin urgjent në spital.
Dyshimet paraprake lidhen me faktin se foshnja mund të mos jetë ushqyer në mënyrë të rregullt, ndërsa disa burime sugjerojnë se nëna mund të mos ketë qenë në gjendje të kujdesej siç duhet për të. Po ashtu, raportohet se nëna mund të ketë probleme të shëndetit mendor, një çështje që pritet të verifikohet nga autoritetet.
