PS ka paralajmëruar se do të rrëzojë sot kërkesën e SPAK për heqjen e imunitetit për Belinda Balluku.
Ndërkohë, Partia Demokratike do të zhvillojë protestë para godinës së Kuvendit. Në Parlament, kanë mbërritur deputetët e PS të cilët kanë përdorur një hyrje tjetër për në godinën e Kuvendit, hyrjen nga Akademia e Shkencave, ndërkohë që deputetët e PD nuk kanë mbërritur ende.
Në njoftim për këtë protestë, janë vendosur në gatishmëri 1500 efektivë. Gjithashtu para godinës janë vendosur edhe gardh metalik.
Edhe në institucione të tjera janë vendosur kordonë të policisë dhe gardh metalik. Brenda Kuvendit janë vendosur edhe forca të tjera. Gjithashtu para godinës së Kuvendit është vendosur edhe një podium ku pritet të mbahet fjala e tyre.
Socialistët kanë nisur të paraqiten në Kuvend që prej orës 8:14 ndërsa në orën 09:00 pritet të nisë mbledhja e grupit parlamentar. Ka qenë porosi e Taulant Ballës që deputetët të paraqiten më herët për të mos krijuar përplasje me protestën e opozitës. Gjithashtu ata duhet të futen nga hyrja anësore.
Brenda sallës, mazhoranca dhe opozita pritet të përplasen ashpër mbi kërkesën e SPAK, e cila insiston në heqjen e lirisë së Belinda Ballukut.
Partia Socialiste ka deklaruar votën kundër dhënies se autorizimit, ndërsa PD, në mungesë të kartonëve, ka në plan të tregojë forcën si brenda dhe jashtë kuvendit ku ka thirrur në ndihmë mbështetësit e saj.
