Familja e Martin Canit ka reaguar pas vendimit të fundit të Gjykatës Kushtetuese, e cila shpalli antikushtetues vendimin për mbylljen e rrjetit social TikTok në Shqipëri. Përmes një deklarate publike, familjarët e të riut që humbi jetën një vit më parë pranë shkollës “Fan Noli”, theksojnë se ky vendim vërteton se përgjegjësia nuk mund t’i faturohet një platforme sociale.
Sipas tyre, tragjedia që i mori jetën Martinit nuk erdhi si pasojë e TikTok-ut, por nga dështimi i institucioneve për të garantuar sigurinë e të rinjve.
Në reagimin e tyre, familja Cani akuzon qeverinë për përdorimin e kësaj ngjarjeje si justifikim për masa që, sipas tyre, cenojnë lirinë e shprehjes.
“Ky vendim nxjerr në pah hipokrizinë e një qeverie që, në vend që të përballej me përgjegjësinë për dështimet e saj, zgjodhi të përdorte gjakun e djalit tonë si pretekst për censurë dhe manovra politike,” thuhet në deklaratë.
Familjarët shtojnë se ndërkohë që debati publik u fokusua tek mbyllja e aplikacioneve, problemet reale që lidhen me sigurinë vazhduan të prodhonin viktima të tjera.
“Ndërsa shteti merrej me mbylljen e platformave, dështimet e tij vazhduan të prodhojnë tragjedi. Fillimisht një i mitur në Maliq dhe së fundmi një tjetër jetë e humbur në Durrës,” theksojnë ata.
Familja Cani shprehet se nuk do të ndalet së kërkuari drejtësi për djalin e tyre dhe për çdo fëmijë që, sipas tyre, ka rënë viktimë e një sistemi që nuk ka arritur të garantojë mbrojtje dhe siguri.
“Ne nuk do të heshtim. Kërkojmë drejtësi për Martinin dhe për çdo fëmijë tjetër që u bë viktimë e këtij sistemi të kalbur. Nuk do të lejojmë që emri i djalit tonë të përdoret si mburojë për dështimet e askujt,” përfundon reagimi i familjes.
Ndërkohë, Gjykata Kushtetuese sqaroi se ndërprerja e aksesit në TikTok përbën një kufizim të lirisë së shprehjes dhe të shtypit. Sipas vendimit, ndërhyrja nuk ishte e mbështetur në një bazë ligjore të qartë dhe nuk përmbushte kriterin e proporcionalitetit.
Megjithatë, Gjykata theksoi se qëllimi për të mbrojtur fëmijët nga ndikimet negative të rrjeteve sociale është një objektiv i rëndësishëm për interesin publik, por masa të tilla nuk mund të zëvendësojnë përgjegjësinë e institucioneve për garantimin e sigurisë së qytetarëve.
