Komuniteti shkencor po shqyrton jo vetëm parandalimin dhe trajtimin e humbjes së dëgjimit, por edhe mundësinë që kjo të shërbejë si tregues i gjendjeve serioze neurologjike, përfshirë goditjen në tru, raporton salute.eu.
Një studim i botuar në The Lancet Neurology dhe i kryer në UCL Queen Square në Londër analizoi pacientë që u paraqitën në urgjencë me dyshime për goditje në tru dhe probleme dëgjimi. Studiuesit theksuan se goditjet në qarkullimin e pasmë të trurit shpesh diagnostikohen vonë, pasi simptomat janë më të vështira për t’u dalluar.
Ndryshe nga goditjet në qarkullimin e përparmë, të cilat shoqërohen me paraliza ose vështirësi në të folur, goditjet e pasme mund të shfaqen me simptoma më të lehta si marramendje, trullosje dhe ndryshime në dëgjim. Nga 71 pacientët e analizuar për këto simptoma, 10% raportuan probleme dëgjimi që fillimisht nuk u vlerësuan. Testet audiologjike më vonë zbuluan humbje të dëgjimit në 15% të rasteve, dhe në mbi gjysmën e këtyre rasteve u diagnostikua një ngjarje akute vaskulare që ishte kaluar pa u vënë re.
Ekspertët nënvizojnë rëndësinë e testimit rutinor të dëgjimit, pasi shumë pacientë fokusohen në marramendje ose të përziera dhe neglizhojnë problemet e dëgjimit. Profesoresha Arianna Di Stadio shpjegon se arteria cerebelare inferiore anteriore (AICA) furnizon me gjak veshin e brendshëm dhe strukturat qendrore të rrugëve audiovestibulare, dhe bllokimi i saj mund të shkaktojë simptoma të lehta ose të rënda.
Studimi nxjerr në pah se humbja e dëgjimit mund të jetë një paralajmërim i hershëm për goditje në tru dhe duhet të merret seriozisht nga mjekët dhe pacientët.
