Një debat i fortë politik në studion e emisionit Opinion është shndërruar mbrëmjen e sotme në një incident të paprecedentë, duke kulmuar me përplasje fizike mes gazetarit Berat Buzhala dhe autorit Albatros Rexhaj.
Diskutimi, i fokusuar mbi dënimet e krerëve të UÇK-së, ishte i tensionuar që në nisje, me tone të larta dhe replika të forta mes të ftuarve. Situata doli jashtë kontrollit në momentin kur Rexhaj iu drejtua Buzhalës me fjalët se “nuk është ai pronar i debatit”, deklaratë që u pasua menjëherë me reagim impulsiv nga gazetari.
Buzhala u ngrit nga vendi i tij dhe tentoi t’i afrohej fizikisht Rexhajt, duke krijuar një moment kaotik në transmetim të drejtpërdrejtë. Moderatori i emisionit, Blendi Fevziu, ndërhyri me shpejtësi për të ndalur përshkallëzimin e situatës, ndërsa stafi i studios u mobilizua për të shmangur kontaktin fizik mes palëve.
Ngjarja u transmetua live dhe pamjet u përhapën menjëherë në rrjetet sociale, ku reagimet kanë qenë të shumta. Një pjesë e publikut e konsideroi të papranueshme sjelljen në një studio televizive, ndërsa të tjerë theksuan klimën e polarizuar që shoqëron debatet politike.
Pas incidentit, Buzhala reagoi në Facebook duke kërkuar falje publike për veprimin e tij. “Absolutisht kërkoj falje për sjelljen. Komplet gabim”, shkroi ai, duke pranuar se reagimi ishte i nxituar.
Deri më tani, nuk ka një qëndrim zyrtar nga produksioni i emisionit lidhur me ngjarjen.
View this post on Instagram
