Një dokumentar i ri që pritet të transmetohet së shpejti ka rikthyer në vëmendje grabitjen e bujshme të ndodhur në Muzeun e Luvrit më 19 tetor 2025, një nga ngjarjet më të rralla kriminale në historinë e institucionit. Pamjet filmike, të cilat do të shfaqen në emisionin televiziv francez Sept à Huit, ofrojnë detaje të reja mbi mënyrën se si autorët vepruan brenda muzeut.
Sipas mediave franceze, në video shihet një nga grabitësit duke tentuar të thyejë vitrinën e ekspozimit fillimisht me një mjet të fortë dhe më pas me grushte, në përpjekje për të marrë bizhuteritë e çmuara. I veshur me një jelek me ngjyra të verdha dhe të zeza, ai bashkohet më pas me bashkëpunëtorin e tij për të çmontuar një vitrinë tjetër dhe për të marrë objekte të tjera me vlerë të lartë.
Edhe pse kanë kaluar tre muaj nga grabitja, dhe katër persona të dyshuar ndodhen aktualisht në paraburgim, sendet e vjedhura ende nuk janë gjetur. Autoritetet franceze nuk kanë asnjë informacion të saktë mbi vendndodhjen e tyre, duke mos përjashtuar asnjë pistë: nga fshehja brenda territorit francez, deri te mundësia që ato të jenë hedhur në lumin Senë apo transferuar jashtë vendit.
Prokurorja e përgjithshme e Parisit, Laure Bekou, ka deklaruar se rikuperimi i bizhuterive mbetet prioritet absolut. Ajo theksoi se hetimet janë ende në zhvillim dhe se nuk ka prova që grabitja të jetë porositur, megjithëse kjo hipotezë po shqyrtohet. “Hetimi do të vazhdojë pa afate të përcaktuara, derisa e vërteta të zbardhet plotësisht,” u shpreh ajo.
View this post on Instagram
