Aktorja britanike Marisa Abela ka ndarë së fundmi një histori personale që ka prekur publikun, duke folur hapur për përballjen e saj me kancerin e tiroides dhe shenjat e para që e çuan drejt diagnostikimit. Ylli i serialit të njohur “Industry” u përball me këtë sëmundje serioze në moshën vetëm 23-vjeçare, një periudhë kur karriera e saj sapo kishte nisur të merrte hov.
Në një intervistë për The Times, Abela, sot 29 vjeçe, ka treguar se është plotësisht e shëruar, por se jeta e saj ka ndryshuar përgjithmonë. Për shkak të heqjes së tiroides, ajo duhet të marrë terapi hormonale për gjithë jetën dhe t’i nënshtrohet kontrolleve të rregullta mjekësore. “Gjithçka është në rregull tani, falë Zotit. Ilaçet që marr zëvendësojnë funksionin e tiroides. Nuk i anashkaloj kurrë kontrollet, sepse hormonet janë thelbësore për funksionimin normal të trupit, sidomos për gratë”, është shprehur ajo.
Aktorja zbuloi se sinjali i parë shqetësues ishte një lodhje e vazhdueshme dhe e pazakontë, e cila nuk largohej me pushim. Pas ekzaminimeve mjekësore, u zbulua një masë në qafë, që çoi në një operacion të gjatë tetë-orësh dhe më pas në terapi me jod radioaktiv.
Pas trajtimit të suksesshëm, Abela iu rikthye jetës normale dhe vazhdoi rrugëtimin e saj profesional. Paralelisht me suksesin në aktrim, ajo përjetoi edhe lumturi personale, duke u martuar vitin e kaluar me Jamie Bogyo, të cilin e kishte njohur gjatë studimeve në Akademinë Mbretërore të Artit Dramatik. Historia e saj shërben sot si një mesazh ndërgjegjësues për rëndësinë e dëgjimit të trupit dhe kujdesit shëndetësor në kohë.
