Vëllai i trajnerit të Cagliarit, Fabio Pisacane, Gianluca Pisacane, 27 vjeç, është sulmuar mbrëmë në qendër të Napolit, ndërmjet Quartieri Spagnoli dhe Rrugës Toledo, pranë aktiviteteve tregtare të familjes. Ai mori goditje me armë në këmbë dhe u dërgua menjëherë në spitalin Pellegrini, ku mjekët konfirmuan se është jashtë rrezikut për jetën.
Fillimisht u raportua se edhe babai i tij kishte marrë pjesë në incident, por vetë trajneri Pisacane e mohoi përfshirjen e të atit në ngjarje. Familja ende nuk ka bërë një denoncim formal, por policia ka nisur hetimet, duke analizuar imazhet e kamerave të sigurisë pranë njësive tregtare për të ndërtuar dinamikën e ngjarjes dhe për të identifikuar autorët. Hetimet e para sugjerojnë se nuk bëhet fjalë për grabitje, megjithëse nuk përjashtohet mundësia që agresorët të synonin të ardhurat e mbrëmjes së lokalit të familjes Pisacane, “Pisadog19 Spritz”.
Fabio Pisacane u shpreh përmes rrjeteve sociale: “Ashtu sic raportohet nga disa media, këtë natë, vëllai im Gianluca u përfshi në një agresion duke mbetur i plagosur me armë zjarri. Po kthehej në shtëpi pasi kishte mbyllur lokalin e familjes në Quartieri Spagnoli pas një tjetër dite pune. Dua t’ju siguroj të gjithëve për gjendjen e tij; nuk është në rrezik për jetën, është plagosur në këmbë, është mirë duke marrë parasysh eksperiencën që përjetoi. Sigurisht, u trembëm shumë; për të, për të gjithë familjen tonë. Nuk donin të më tregonin që të mos shqetësohesha, e mësova vetëm këtë pasdite. Ndërsa babai im, ndryshe nga sa është shkruar nuk është sulmuar. Në këto orë kam marrë shumë mesazhe dhe telefonata, ju falënderoj të gjithëve për solidaritetin dhe afeksionin”.
Ngjarja ka shkaktuar shqetësim të madh në komunitet, ndërsa autorët ende nuk janë identifikuar.
