Një nga pilotët më të suksesshëm në historinë e Formula 1, Michael Schumacher, feston sot ditëlindjen. Legjenda gjermane ka lindur më 3 janar 1969 dhe mbetet një nga figurat më ikonike të sportit motorik, pavarësisht se prej vitesh jeton larg syrit të publikut.
Me rastin e ditëlindjes së tij, urimet nuk kanë munguar nga bota e Formula 1, përfshirë edhe dy skuadrat me të cilat ai la gjurmë të pashlyeshme: Ferrari dhe Mercedes. Skuadra italiane shkroi në rrjetet sociale: “Dita kur lindi një legjendë”, ndërsa Mercedes u shpreh: “Gëzuar ditëlindjen, Michael. Një ikonë e vërtetë e F1 dhe një pjesë shumë e rëndësishme e historisë sonë”.
Schumacher ka ndërtuar një karrierë të jashtëzakonshme, duke fituar shtatë tituj kampion bote në Formula 1 – dy me Benetton dhe pesë radhazi me Ferrarin. Ai ka regjistruar 91 fitore në gara, 68 pole position dhe dhjetëra rekorde që për vite me radhë dukeshin të paarritshme, duke e kthyer emrin e tij në sinonim të suksesit dhe dominimit në pistë.
Së fundmi, vëllai i tij, Ralf Schumacher, ka bërë një krahasim interesant mes Michael Schumacherit dhe kampionit aktual, Max Verstappen. Ish-piloti i Williams dhe Toyota u shpreh se Verstappen tashmë ka një cilësi që e karakterizonte edhe Michaelin. “Të kesh njerëz rreth vetes që do të shkonin në zjarr për ty është thelbësore. Max tani e ka edhe ai atë ‘gjenin Michael’”, deklaroi Ralf.
Edhe pas dekadash, emri i Michael Schumacher vazhdon të frymëzojë breza pilotësh dhe tifozësh anembanë botës.
