Në shtëpinë e BBVA, dita e sotme nisi me një sfidë ndryshe nga Vëllai i Madh, i cili u dha banorëve mundësinë për të përjetuar të ashtuquajturën “Dita perfekte”. Loja kërkonte bashkëpunim maksimal dhe respektim strikt të rregullave nga të gjithë banorët.
Sipas sfidës, banorët duhej të zgjoheshin sapo të binte gongu, të visheshin njëkohësisht, të realizonin një përqafim në grup, të lanin dhëmbët së bashku, të bënin dush të gjithë bashkë dhe më pas të hanin mëngjes në grup. Çdo veprim duhej kryer kolektivisht, pa u ndarë apo shmangur nga grupi.
Ndërkohë, pesë banorë të përzgjedhur nga lideri i shtëpisë, Seno, kishin edhe një detyrë shtesë: të realizonin gjuajtje në kosh, në një kuti të vendosur mbi tavolinën e living-ut. Kjo pjesë e lojës kërkonte përqendrim dhe koordinim, duke shtuar më tej vështirësinë e sfidës.
Megjithatë, sfida hasi në vështirësi që në momentet e para. Sa herë që Vëllai i Madh vërente se rregullat nuk po respektoheshin nga të gjithë banorët, binte gongu dhe loja niste sërish nga e para, duke i detyruar banorët të ktheheshin për të fjetur.
Refuzimi i disa banorëve për të zbatuar rregullat e lojës bëri që sfida të dështonte përfundimisht. Si pasojë, Vëllai i Madh futi në shtëpi një zarf të kuq, përmes të cilit njoftoi zyrtarisht se “Dita perfekte” kishte dështuar dhe se do të pasonin penalizime.
“Banorë, Vëllai i Madh iu dha disa herë mundësinë për të nisur ‘Ditën perfekte’, por ju me vetëdije zgjodhët të mos respektonit rregullat e lojës. Si pasojë, do të përballeni me penalizime”, thuhej në mesazhin e zarfit të kuq.
