Universiteti i Michiganit ka shkarkuar trajnerin e futbollit amerikan, Sherrone Moore, pasi një hetim i brendshëm zbuloi “prova të besueshme” se ai ishte përfshirë në një marrëdhënie të papërshtatshme me një anëtare të stafit. Vetëm disa orë pas njoftimit të shkarkimit, Moore, 39 vjeç, është ndaluar nga policia të mërkurën, më 10 dhjetor.
Sipas një deklarate për ESPN, Departamenti i Policisë në Saline ndihmoi në lokalizimin dhe ndalimin e Moore, i cili më pas u dorëzua tek policia e Pittsfield Township për hetime të mëtejshme lidhur me akuza të mundshme. Autoritetet në Pittsfield konfirmuan për FOX 2 se oficerët iu përgjigjën një raporti për një sulm të dyshuar dhe se i dyshuari është marrë në paraburgim, ndërsa hetimet vazhdojnë.
Policia theksoi se incidenti nuk paraqet rrezik për komunitetin dhe se nuk mund të publikohen detaje të tjera për shkak të natyrës së hetimit.
Drejtori Atletik i Universitetit të Michiganit, Warde Manuel, deklaroi se Moore u shkarkua “me shkak”, pasi veprimet e tij përbëjnë shkelje të qartë të politikave të institucionit. Ai nënvizoi se universiteti ka tolerancë zero për këtë lloj sjelljeje.
Si trajner i përkohshëm i skuadrës do të shërbejë ndihmëstrajneri Biff Poggi. Michigan Wolverines pritet të përballen me Texas Longhorns në Citrus Bowl në natën e ndërrimit të viteve.
Moore iu bashkua stafit të Michiganit në vitin 2018 dhe fitoi popullaritet të madh pasi drejtoi ekipin gjatë pezullimeve të Jim Harbaugh në sezonin 2023 dhe gjatë titullit kombëtar të vitit 2024.
