Sean “Diddy” Combs mund të përballet me masa disiplinore ndërsa vazhdon të vuajë dënimin e tij në Federal Correctional Institution, Fort Dix në New Jersey. Sipas raportimeve të CBS News, dokumentet e burgut tregojnë se producenti i njohur mund të humbasë privilegjet e telefonit, pasi dyshohet se ka realizuar një telefonatë treshe të paautorizuar pak pas transferimit të tij në këtë institucion.
Megjithatë, përfaqësuesi i tij ka mohuar çdo shkelje, duke deklaruar se telefonata është realizuar nga një avokat, në kuadër të komunikimit avokat-klient, dhe se gjithçka ishte “brenda rregullave dhe plotësisht e përshtatshme.”
“Ai është pjesë e programit të trajtimit të varësisë dhe punon në bibliotekën e kapelës së burgut,” u shpreh zëdhënësi Juda Engelmayer për PEOPLE. “Ai nuk ka thyer asnjë rregull të burgut. Ai është i përqendruar te vetë-disiplina dhe kthimi drejt një jete të rregullt.”
Sipas TMZ, më herët ishte raportuar se Combs ishte kapur duke konsumuar alkool të bërë në mënyrë artizanale në brendësi të burgut, por kjo pretendim u hodh poshtë plotësisht nga përfaqësuesi i tij.
Dënimi dhe lëvizjet brenda sistemit të burgjeve
Combs, i cili u arrestua në shtator 2024, u transferua kohët e fundit në Fort Dix pasi më parë mbahej në Metropolitan Detention Center në Brooklyn. Ai aktualisht po vuan një dënim prej 50 muajsh burg, pasi u shpall fajtor për dy akuza që lidhen me transportimin e personave me qëllim prostitucioni.
Përfaqësuesi i tij ngul këmbë: “Ka raportime të pavërteta”
“Ka pasur shumë raportime të rreme dhe të pamatura në media,” shtoi zëdhënësi. “Ai është i fokusuar të qëndrojë i matur dhe të ndjekë rregullat. Ai po i merr seriozisht këto detyrime.”
