Një vendim gjyqësor në shtetin e Teksasit ka detyruar një filial të Coca-Cola-s të ndalojë shpërndarjen e pijes së njohur Dr. Pepper, një prej markave më të shitura në botë. Vendimi, që hyri në fuqi më 27 tetor, i jep fund një marrëveshjeje historike midis gjigantit ndërkombëtar dhe prodhuesit të pijeve Keurig Dr Pepper (KDP).
Konflikti nisi pasi kompania Reyes Coca-Cola Bottling, e cila merret me shpërndarjen e produkteve të Coca-Cola-s në disa zona të Kalifornisë dhe Nevadës, paditi KDP-në për ndërprerjen e njëanshme të kontratës së shpërndarjes. Sipas Reyes, ndërprerja ishte “e pajustifikuar”, megjithë investimet e bëra dhe respektimin e kushteve të marrëveshjes. Megjithatë, gjykata e qarkut Collin në Teksas vendosi në favor të KDP-së, duke i lejuar kompanisë të rikthejë kontrollin e plotë mbi shpërndarjen e Dr. Pepper në ato territore.
Pasojat do të ndihen menjëherë në restorante, kinema dhe pika të lidhura me Coca-Cola-n, të cilat nuk do të mund të ofrojnë më Dr. Pepper në makineritë e tyre. Në vend të tij, do të përdoret Mr. Pibb, alternativa me shije qershie nga vetë Coca-Cola, por konsumatorët e rregullt mbeten skeptikë ndaj këtij zëvendësimi.
Dr. Pepper, që në vitin 2024 tejkaloi Pepsi-n duke u bërë pija e dytë më e shitur në SHBA, ka fituar terren falë fushatave të fuqishme reklamuese dhe mbështetjes së të rinjve. Ndërsa Coca-Cola humbet një produkt të rëndësishëm nga portofoli i saj, kompania pritet të kërkojë mënyra të reja për të mbajtur pozitat në tregun e pijeve të gazuara.
