Ditën e djeshme, portali “Lajmi.net” publikoi listën e pikëve përfundimtare që morrën konkurrentët në Këngën Magjike, sipas së cilës këngëtari nga Maqedonia, Berkan, u bë pjesë e finales, edhe pse nuk kishte mbledhur pikët e nevojshme nga kolegët për të qenë finalist.
Këngëtari që qëndronte në vendin e 21-të ishte Devis Xherahu, ndërsa Berkani renditej i 33-i, ndaj finalja nuk i takonte atij, shkruante portali duke zbuluar “skandalin” që ndodhi në këtë festival.
Por producenti i festivalit, Ardit Gjebrea, ka sqaruar se kjo praktikë nuk është hera e parë që ndiqet në Kënga Magjike. Edhe në edicionet e mëparshme, çmimet e televizioneve Klan dhe RTV21 i kanë marrë emra që jo domosdoshmërish i kanë mbledhur pikët e nevojshme për të mbërritur në finale.
Një rast i tillë ka qenë ai i këngëtares Big Mama dy edicione më parë, e cila është shpallur gjithashtu fituese e çmimit RTV21 apo i Shpat Kasapit një vit më parë: “TV Klan dhe RTV21 mund të zgjedhin për finalen (njësoj siç bëri edhe juria “New Artist” këtë vit) cilindo nga artistët që ata mendojnë. Ka 15 vite që ndodh kështu. Herë e kanë zgjedhur nga ata që kanë votuar artistët për finale, e herë jo”, thotë Gjebrea për revistën Who.
“Nëse memoria nuk mban as edhe 1 vit, të paktën investigimi të jetë ndonjëherë pjesë e punës. Sa qesharake kur sheh njerëz që bërtasin: E gjetaaaaa! Ndërkohë që ka 15 vite që është aty”, – thotë producenti duke e mbyllur me kaq “skandalin”.
