Një ngjarje tragjike ka ndodhur në orët e para të mëngjesit në një banesë në qytetin e Korçës, ku një zjarr i rënë në ambientin e kuzhinës ka përfunduar me pasoja të rënda. Sipas burimeve zyrtare, në momentin e mbërritjes së forcave zjarrfikëse, në ambientet jashtë banesës u gjetën dy fëmijë në gjendje të rënduar nga asfiksia.
Djali 14-vjeçar, Luka Hazisllari, është gjetur pa ndjenja dhe në gjendje kome, ndërsa motra e tij më e vogël, Nefeli Hazisllari, 6 vjeçe, ishte në gjendje të vetëdijshme por me shenja të dukshme asfiksie. Të dy fëmijëve iu dha ndihma e parë në vendngjarje dhe më pas u transportuan me urgjencë në spitalin rajonal të Korçës për trajtim mjekësor të specializuar.
Fatkeqësisht, nëna e tyre, Merjeme Hazisllari, është gjetur pa shenja jete pranë derës së kuzhinës. Dyshohet se ajo është përpjekur të shpëtojë fëmijët, por është mbytur nga tymi i dendur përpara se të arrinte të dilte jashtë.
Grupi hetimor dhe ekspertët e zjarrfikëses janë ende në vendngjarje për të përcaktuar shkaqet e zjarrit, ndërsa Policia e Korçës ka nisur një hetim të plotë për zbardhjen e plotë të ngjarjes.Hetimet vijojnë për të zbuluar shkaqet e zjarrit dhe rrethanat e plota të kësaj tragjedie familjare.
