Një tragjedi e rëndë ka tronditur qytetin e Maliqit, ku pas një zjarri të fuqishëm në banesë, humbën jetën një nëna dhe djali i saj i mitur. Ngjarja e rëndë ndodhi rreth orës 13:30, në bllokun nr. 3 të qytetit, në banesën e shtetasit V.A. Pas shpërthimit të flakëve, menjëherë shkuan shërbimet e Policisë dhe zjarrfikësve, të cilat bënë të mundur shuarjen e zjarrit.
Si pasojë e zjarrit dhe asfiksisë, në vendngjarje humbi jetën menjëherë nëna e dy fëmijëve, Mejreme Azisllari, 40 vjeçe. Dy fëmijët e saj, 14 dhe 6 vjeç, u transportuan me urgjencë drejt spitalit të Korçës për të marrë ndihmën mjekësore. Tragjedia u thellua më tej pasi, pas transportimit në spital, djali 14-vjeçar ndërroi jetë.
Ndërkaq, fëmija tjetër, 6 vjeç, ka mbetur në kujdesin e mjekëve dhe ndodhet në gjendje të rënduar. Policia dhe grupi hetimor janë në vendngjarje dhe po punojnë për të zbardhur shkaqet e këtij zjarri tragjik dhe për të dokumentuar rastin në përputhje me ligjin.
Ky incident ka shkaktuar trishtim të thellë në komunitetin e Maliqit, ku fëmijët e humbën prindin dhe një vëlla në një mënyrë kaq të dhimbshme.
Autoritetet po vijojnë hetimet për të zbardhur plotësisht shkaqet e kësaj tragjedie të pashembullt.
