Të gjithë i kemi përjetuar të paktën një herë, ato ëndrra që ngjallin kuriozitet, turp apo kureshtje kur zgjohemi në mëngjes. Ëndrrat seksuale, pavarësisht se mund të duken të çuditshme, janë më të zakonshme se sa mendojmë dhe shpesh flasin më shumë për emocionet, nevojat dhe gjendjen tonë psikologjike, sesa për dëshira të vërteta fizike.
Sipas psikologëve, ëndrrat me përmbajtje erotike janë një mënyrë e nëndërgjegjes për të shprehur dëshira të fshehta, tensione emocionale apo nevojën për afërsi dhe vetëbesim. Ato mund të jenë reflektim i marrëdhënieve aktuale, i ndjenjave të papërfunduara ose i periudhave të stresit e pasigurisë.
Çfarë mund të nënkuptojnë ëndrrat seksuale më të zakonshme?
Të kesh marrëdhënie me një ish-partner – shpesh nuk tregon dëshirë për t’u rikthyer, por nevojën për mbyllje emocionale ose për të kuptuar diçka që ka mbetur pezull.
Të kesh marrëdhënie me një person të panjohur – lidhet me zbulimin e vetes dhe dëshirën për eksperienca të reja.
Të kesh ëndrra me një mik/mikeshë – zakonisht tregon admirim ose lidhje të fortë emocionale, jo domosdoshmërisht tërheqje fizike.
Të përfshihesh në situata “të ndaluara” – mund të simbolizojë dëshirën për më shumë liri, pavarësi ose sfida në jetën reale.
Të kesh ëndrra me partnerin aktual që të tradhton – shpesh tregon pasiguri ose frikë për humbjen e kontrollit emocional në marrëdhënie.
Psikologët theksojnë se nuk duhet t’i marrim këto ëndrra si parashikime apo dëshmi të dëshirave të fshehta, por si pasqyra të gjendjes sonë emocionale. Ato janë një mënyrë për trurin që të përpunojë ndjenja, situata të pashprehura dhe mendime që në jetën e përditshme nuk i pranojmë plotësisht.
Në fakt, studimet tregojnë se rreth 80% e njerëzve kanë ëndrra me përmbajtje seksuale dhe ato ndodhin më shpesh gjatë fazës REM të gjumit, kur truri është më aktiv dhe emocionet janë më të forta.
Endrrat seksuale nuk janë tabu, por një pjesë krejtësisht natyrale e psikës njerëzore. Ato nuk tregojnë kush jemi në realitet, por çfarë ndjejmë, çfarë na mungon dhe çfarë truri përpiqet të kuptojë në heshtje.
