Shqipëria ka kaluar në avantazh ndaj Letonisë. Goli është shënuar në minutën e 24’ të ndeshjes nga pika e bardhë e penalltisë.
Ka qenë një prekje me dorë nga mbrojtësi letonez gjatë një aksioni të kuqezinjve. Asllani ka shënuar golin e tij të katërt me bluzën e kombëtares.
Këtë të martë në orën 20:45 Kombëtarja zbriti në fushë për përballjen kundër Letonisë. Dueli vlen për Grupin K kualifikues të Kupës së Botës 2026, event që do mbahet verën që vjen në SHBA, Meksikë dhe Kanada. Sfida e sotme është kyçe për tanët, që në gjysmë të rrugëtimit në këtë grup ende i kanë shanset në dorën e vet, kjo pasi dy ekipet e renditura më sipër, Anglia dhe Serbia përballen në Beograd në një ndeshje direkte.
Kuqezinjtë e Sylvinhos janë të ‘dënuar’ për tri pikë, gjë që e theksoi edhe vetë trajneri në konferencën e një dite më parë. Për ta bërë këtë Shqipërisë i duhet të thyej statistikat, pasi në gjashtë takime kundër Letonisë që nga 1992 ka gjashtë barazime në po kaq ndeshje. Barazim 1-1 përfundoi edhe sfida e 10 qershorit të këtij viti për Grupin K kualifikues në Riga.
Grupimi ultras i Kombëtares, ‘Tifozat Kuq e Zi’ e kanë bojkotuar këtë duel pas përplasjes së vazhdueshme me FSHF-në për biletat. TKZ doli kundër FSHF-së për bashkorganizimin e Euro 2027 për moshat U-21 me Serbinë, teksa FSHF u ‘hakmorr’ duke i lënë jashtë sektorit të tyre në stadium dhe biletave të dedikuara për anëtarët e saj. TKZ ka bërë thirrje për tifozët që të mos shkojnë në stadium. Ndryshe nga çdo herë, FSHF ka nxjerrë në shitje biletat edhe fizikisht, kjo për shkak të interest jo të lartë fillimisht. Pak orë përpara ndeshjes, FSHF njoftoi se janë shitur të gjitha biletat e disponueshme dhe në stadium do jenë diçka më shumë se 16 mijë tifozë.
