Një tërmet i fuqishëm është ndjerë mbrëmjen e djeshme në Athinë dhe zonat përreth, duke shkaktuar shqetësim te banorët, por fatmirësisht pa pasoja në njerëz apo dëme materiale.
Sipas të dhënave paraprake nga Instituti Gjeodinamik i Greqisë, lëkundjet sizmike janë regjistruar rreth orës 22:08 me orën lokale, me epiqendër në zonën e Nea Stira, rreth 70 kilometra në verilindje të Athinës. Tërmeti ka pasur një magnitudë prej 5.1 deri në 5.3 ballë të shkallës Rihter dhe një thellësi të vogël prej vetëm 2 kilometrash, gjë që ka bërë që lëkundja të ndihet fuqishëm në sipërfaqe.
Sipas dëshmitarëve, tërmeti ka zgjatur rreth 10 sekonda dhe është ndjerë jo vetëm në Athinë, por edhe në disa qytete të tjera të Greqisë qendrore. Banorët raportojnë se objektet në shtëpi janë tundur ndjeshëm, por pa pasoja të mëdha.
Autoritetet greke kanë dalë menjëherë në terren për të monitoruar situatën dhe për të garantuar sigurinë e qytetarëve. Deri më tani, nuk raportohet për dëme në infrastrukturë apo persona të lënduar.
Ekspertët kanë deklaruar në mënyrë të menjëhershme se tërmeti është pjesë e aktivitetit normal sizmik në rajon dhe nuk ka vend për panik, megjithatë situata do të vazhdojë të monitorohet nga afër në ditët në vijim.
