Në fillim të vitit të ri shkollor, nëna e 14-vjeçarit Martin Cani, i cili humbi jetën tragjikisht më 18 nëntor 2024, ka shpërndarë një postim prekës në rrjetet sociale. Florina, e mbushur me dhimbje, shprehet se ky është një vit shkollor i pazakontë për të, pasi do ta kalojë pa djalin e saj. Ajo thekson se çdo ditë që kalon bëhet edhe më e rëndë dhe boshllëku që ka lënë humbja e Martinit është i padurueshëm.
Në postimin e saj, nëna e Martinit shpreh dhimbjen për humbjen e tij, duke kujtuar se tragjedia mund të ishte shmangur. Ajo akuzon mësuesit për mosmarrjen e masave dhe për neglizhencën që çoi deri në këtë ngjarje tragjike. Sipas saj, ata nuk e mbrojtën djalin e saj dhe as nuk e lajmëruan për konfliktin që kishte me bashkëmoshatari Mario Përlleshaj. Florina shprehet se, po të ishin vepruar më shpejt, ndoshta djali i saj do të ishte ende gjallë.
Postimi i nënës së Martin Canit:
“I dashur Martin, po fillon një vit i ri shkollor pa ty dhe zemra ime nuk duron këtë boshllëk. Unë ndjehem e humbur, e thyer dhe e plagosur. Çdo ditë që kalon bëhet më e rëndë, më mungon buzëqeshja jote, dashuria, energjia dhe pranija jote. Martini im, ti ishe drita e syve të mi, ëndrra ime, shpresa ime. Ikja jote mizore nga kjo botë më mori frymën, por nuk mund ta marrë kurrë dashurinë për ty. As vdekja nuk mund të ta shuajë atë. Dhimbja ime bëhet edhe më e madhe kur mendoj se kjo tragjedi mund të ishte shmangur. Mësuesit nuk të mbrojtën dhe nuk na lajmëruan për zënkën që kishe me bashkëmoshatarin tënd. Ishte neglizhenca e tyre që na çoi deri këtu, sepse po të ishin kujdesur më shumë, sot do ta kisha ende dritën e syve të mi.”
Rikujtojmë që Martin Cani u qëllua për vdekje më 18 nëntor 2024 nga bashkëmoshatari i tij, Mario Përlleshaj, pas një konflikti që kishte nisur në oborrin e shkollës “Fan Noli”. Pas përplasjes, situata agravoi jashtë shkollës, ku Përlleshaj nxori një thikë dhe e goditi Martinin në bark. Pasi u plagos, Martin eci disa hapa dhe ra në trotuar para shkollës, ku humbi jetën nga plagët e marra.
I plagosur nga ky konflikt mbeti edhe shoku i ngushtë i Martinit, Luis Meçja, i cili nuk ndodhej në të njëjtën shkollë me ta, por stërviteshin bashkë në të njëjtin klub futbolli. Edhe autori i krimit mori dëmtime dhe u trajtua për disa ditë në një spital privat.
