Policia spanjolle ka nisur një hetim për vrasje të dyshuara në bord të një varke me emigrantë, pas mbërritjes së saj në Ishujt Kanarie. Mjeti i mbingarkuar lundronte nga Afrika Perëndimore, dhe sipas autoriteteve, mungojnë rreth 70 persona, ndërsa 251 janë shpëtuar nga rojet bregdetare spanjolle.
Sipas dëshmive tronditëse të të mbijetuarve, gjatë rrugës ka pasur dhunë të rëndë mes pasagjerëve. Disa persona raportohet se janë qëlluar dhe më pas janë hedhur në ujë, ndërsa të tjerë kanë ndërruar jetë nga etja, lodhja ose janë hedhur vetë në det në gjendje konfuzioni pas ditësh të tëra pa ujë e ushqim.
Varka u nis nga Sahara Perëndimore, por mbeti e bllokuar në det për 11 ditë pas një defekti në motor. Kur u shpëtuan, emigrantët ndodheshin rreth 265 milje në perëndim të Dakhla-s.
Policia po heton deri në 30 persona në qendra pritjeje të ndryshme për të identifikuar autorët e mundshëm. Disa të dyshuar janë identifikuar dhe pritet të arrestohen së shpejti. Nëse shpallen fajtorë për vrasje, rrezikojnë burgim të përjetshëm.
Autoritetet spanjolle dhe ato marokene e kanë cilësuar këtë rrugë si një nga më të rrezikshmet në Mesdhe për emigrantët afrikanë.
Rritja e numrit të udhëtimeve të rrezikshme drejt Evropës ka vënë sërish në qendër të debatit krizën humanitare në Mesdhe.
