Një grua 45-vjeçare ka humbur jetën tragjikisht në sy të djalit të saj, pasi ra nga një lartësi prej 88 metrash, vetëm pak çaste pasi kishte kryer me sukses një hedhje me litar për të festuar ditëlindjen e saj.
Elizaveta “Lisa” Guskina ndodhej në Pavlovsk, pranë Shën Petersburgut në Rusi, ku po festonte ditëlindjen e saj duke provuar një sport ekstrem. Ajo kishte realizuar një hedhje të sigurtë me litar nga një kullë e braktisur, por më pas u ngjit sërish në majë të strukturës për të bërë selfie, këtë herë pa asnjë masë sigurie.
Sipas kanalit televiziv Zvezda, Guskina “u ngjit në kullë pa litar sigurie, rrëshqiti dhe ra”. Rënia i shkaktoi vdekjen e menjëhershme.
Ngjarja ndodhi përpara syve të djalit të saj, i cili ishte prezent gjatë gjithë aktivitetit. Videoja e fundit e hedhjes së saj u publikua në rrjete sociale, ku dëgjohet duke thënë “go” para se të lëshohej në ajër.
Autoritetet ruse kanë nisur një hetim për të sqaruar rrethanat e sakta të aksidentit dhe për të parë nëse janë shkelur rregullat e sigurisë në këtë aktivitet ekstrem. Ngjarja ka tronditur opinionin publik në Rusi dhe ka rikthyer debatin për rregullimin ligjor të sporteve të rrezikshme.
