E hëna, 26 gusht, do të jetë një ditë në nder të Artur Zhejit, një nga figurat më të rëndësishme të publicistikës moderne shqiptare. Homazhet do të zhvillohen nga ora 10:00 deri në mesditë në Universitetin e Arteve, ndërsa ceremonia private do të mbahet më pas tek ‘Alba 2000’. Artur Zheji do të prehet në Tufinë, pranë të atit, gjuhëtarit të njohur Petro Zheji.
I lindur në Tiranë nga një familje me prirje kulturore, Zheji ishte gazetar, analist dhe intelektual me karrierë të pasur, i njohur për mendimet kritike dhe stilin e mprehtë. Pas diplomimit për regjisor në Institutin e Lartë të Arteve, filloi karrierën si dramaturg në Teatrin Kombëtar, më pas punoi në median italiane gjatë viteve 90, për t’u rikthyer në Shqipëri gjatë luftës në Kosovë, duke kontribuar me emisionin “Luftë apo paqe në Kosovë”.
Zheji dha kontribut të rëndësishëm si drejtues në RTSH, agjencinë telegrafike shqiptare dhe gazetën Mapo, ndërsa viteve të fundit u identifikua me emisionin “360 gradë”. Për penën e tij të mençur dhe intelektin e shquar, bashkëpunoi edhe me Top Channel.
Artur Zheji u nda nga jeta befas në moshën 63-vjeçare, duke lënë një boshllëk të madh në gazetari dhe jetën publike shqiptare. Homazhet e së hënës do të jenë një rast për të kujtuar dhe nderuar kontributin e tij të çmuar.
