Aktivistja e njohur për çështjet e mjedisit, Greta Thunberg, është deportuar nga Izraeli të martën, një ditë pasi anija me të cilën ajo po udhëtonte drejt Rripit të Gazës u ndalua nga ushtria izraelite.
Lajmin e konfirmoi Ministria e Jashtme izraelite përmes një postimi në rrjetin social X (ish-Twitter), ku shpërndau një foto të Thunberg në një aeroplan dhe bëri të ditur se ajo ishte nisur për në Francë, përpara se të vazhdonte udhëtimin drejt Suedisë.
Sipas grupit ligjor për të drejtat e njeriut Adalah, i cili përfaqëson Thunberg dhe aktivistët e tjerë, ajo, dy aktivistë dhe një gazetar pranuan të deportoheshin dhe të largoheshin nga Izraeli. Aktivistët e tjerë refuzuan dëbimin dhe aktualisht mbahen në paraburgim, në pritje të një vendimi nga autoritetet izraelite.
Thunberg ishte një nga 12 personat që ndodheshin në bordin e anijes “Madleen”, e cila po transportonte ndihma humanitare për popullatën e prekur nga lufta në Gazë. Sipas Koalicionit të Flotiljes së Lirisë, organizatorëve të udhëtimit, anija u kap nga forcat detare izraelite të hënën në mëngjes, rreth 200 kilometra larg bregut të Gazës. Më pas, ajo u shoqërua nga marina izraelite dhe mbërriti në portin e Ashdodit të hënën në mbrëmje.
Aktivistët thanë se qëllimi i misionit ishte të protestonin kundër luftës në vazhdim dhe krizës së rëndë humanitare në Gaza. Nga ana tjetër, autoritetet izraelite deklaruan se anijet e tilla shkelin bllokadën detare të vendosur ndaj Gazës.
Ministria e Jashtme izraelite e cilësoi këtë udhëtim si një veprim për qëllime propagandistike, duke shkruar në rrjetet sociale: “Jahti ‘selfie’ i ‘të famshmëve’ po lundron i sigurt drejt brigjeve të Izraelit”.
