Humbja e një gjigandi të kinemasë shqiptare, regjisorit Pirro Milkani, është përjetuar me ndjeshmëri dhe fisnikëri nga i biri, regjisori Eno Milkani. Në një intervistë ekskluzive për emisionin “Ftesë në 5”, Eno foli me një qetësi të rrallë, buzëqeshje në fytyrë dhe një forcë emocionale që prek çdo dëgjues, duke rrëfyer momentet e fundit të të atit.
“Një ditë u kthye nga kafja me shokët dhe ishte i pafuqishëm. Pati një virozë që më pas solli komplikacione në organet e tjera,” – tha Eno, duke treguar se kishte vetëm një dëshirë në ato momente të vështira: që i ati të mos vuante. “I kërkova doktorëve të mos vuante dhe e mora këtë garanci. Në orën 07:50 të datës 24 maj u nda nga jeta paqësisht.”
Në këtë rrëfim të ndjerë, Eno ndau me publikun edhe pesë fotografi të jetës me të atin, të cilat përbënin për të një galeri kujtimesh e mësimesh të mëdha. Ndër to, mësimi më i rëndësishëm që kishte marrë prej tij ishte: të qëndrosh fisnik, të respektosh çdo njeri pa dallim pune apo pasurie.
