Një ditë pas aksidentit të rëndë rrugor në autostradën afër qytetit Koblenz në Gjermani, që i mori jetën tre shtetasve shqiptarë, mediat vendase kanë nxjerrë në dritë të tjera detaje tronditëse.
Sipas gazetës gjermane Bild, viktimat janë një burrë 53-vjeçar dhe dy gra të moshës 47 dhe 65 vjeç. Ata, së bashku me gjashtë persona të tjerë – të gjithë mes moshës 20 dhe 66 vjeç – ishin duke u kthyer nga një festë familjare në landin e Hesse-s kur ndodhi tragjedia.
Aksidenti ndodhi në orët e para të mëngjesit të 25 majit, rreth orës 03:05. Mjeti me të cilin udhëtonin – një minibus me nëntë vende – doli nga rruga dhe u përmbys. Autoritetet gjermane konfirmojnë se nuk ka pasur përfshirje të automjeteve të tjera në ngjarje, megjithatë një makinë tjetër kaloi më pas mbi rrënojat, duke përkeqësuar situatën në vendngjarje.
Identitetet e plotë të personave të përfshirë ende nuk janë konfirmuar zyrtarisht. Policia gjermane shton se përveç shqiptarëve, në automjet kishte edhe shtetas të huaj, por nuk jepen detaje mbi kombësinë e tyre.
