Ishte një histori që preku miliona: një vajzë e re, e bukur dhe e vendosur, që pretendonte se kishte mposhtur kancerin terminal me receta të shëndetshme dhe mendim pozitiv. Belle Gibson u kthye në ikonë të mirëqenies, ndërtoi një perandori me libra, aplikacione dhe intervista televizive. Por pas këtij imazhi “të shëruar”, fshihej një mashtrim.
Dhjetë vjet më vonë, historia e Gibson po rikthehet në qendër të vëmendjes përmes serialit të Netflix, “Uthulla e mollës”, që ngre pyetje të mëdha për etikën, besimin dhe përfitimin nga dhimbja e të tjerëve.
Autoritetet australiane ende përpiqen të rikuperojnë qindra mijëra dollarë që ajo kishte premtuar për bamirësi. Pavarësisht gjobës prej 410 mijë dollarësh dhe ndalimit të pretendimeve shëndetësore të pabazuara, Gibson nuk ka kërkuar falje publike – dhe ka heshtur për vite të tëra.
Rasti i saj nuk ishte vetëm një mashtrim i thjeshtë – por një thirrje alarmi për industrinë e mirëqenies, ku lajmet virale shpesh zëvendësojnë shkencën, dhe ndjekësit bëhen më të rëndësishëm se e vërteta.
Seriali i Netflix, që po ngjall diskutime të shumta, nuk e përfshin Gibsonin në realizim, por gjurmët e saj në kulturën online janë ende të gjalla.
