Kader Kicaj ka vendosur të thyejë heshtjen e saj ndaj situatave që lidhen me Lumbardh Salihun, duke reaguar publikisht përmes një postimi në Instagram. Ajo ka ndarë detaje dhe mesazhe private, duke hedhur dritë mbi arsyet e qëndrimit të saj të deritanishëm të heshtur.
“Prej shumë kohësh kam zgjedhur heshtjen, edhe pse vazhdimisht jam përmendur në intervista. Heshtja nuk ka qenë mungesë fjalësh, por një zgjedhje e vetëdijshme për të kursyer personin në fjalë – jo për ndonjë arsye tjetër, por për një fije respekti për të kaluarën tonë,” shkruan Kaderi.
Megjithatë, ajo shprehet se ky respekt nuk është reciprok dhe e akuzon Lumbardhin se po e përdor për të përfituar personalisht. “Por kur ky respekt nuk është reciprok dhe për hir të pak vëmendjes apo përpjekjeve për të shpëtuar një imazh të lëkundur, dikush zgjedh të më përdorë si mjet për manipulim, heshtja bëhet pafuqí,” vijon ajo.
Në mesazhet e publikuara, shfaqet një urim i Lumbardhit për ditëlindjen e saj, por Kaderi e konsideron atë si një tentativë për manipulim publik. “Së fundmi, më dërguan një video – një tjetër episod viktimizimi dhe gënjeshtrash të hapura. Nuk është hera e parë, por duhet të jetë hera e fundit,” thekson ajo.
Kaderi gjithashtu i drejtohet Lumbardhit duke e kritikuar për sjelljen e tij, sidomos duke pasur parasysh pretendimet e tij për të qenë një figurë publike që synon të hyjë në politikë. “Dikush që pretendon të hyjë në politikë dhe të fitojë besimin e njerëzve, nuk mund të lejojë vetes të ndërtojë rrugën e tij mbi gënjeshtra, edhe për gjëra bazike, si një urim ditëlindjeje,” shkruan ajo.
Në përfundim, Kaderi i drejtohet hapur Lumbardhit: “Mund të më kesh gënjyer mua, por mos gënje publikun duke vazhduar të flasësh mbi emrin tim. Boll është boll!”
