Daddy Yankee dhe bashkëshortja e tij, Mireddys Gonzalez, i kanë dhënë fund lidhjes pas gati tre dekadash. Edhe pse u fol për një ndarje miqësore, të shtunën avokatët e këngëtarit ngritën një padi kundër gruas së tij në Gjykatën e Shkallës së Parë të San Juan, duke e akuzuar atë për transferime të paautorizuara nga llogaritë e korporatave deri në 100 milionë dollarë.
Sipas avokatit të këngëtarit, Carlos Diaz Olivo, të shtunën u ngritën disa masa ndalimi kundër Mireddys dhe motrës së saj, Ayeicha, për kryerjen e transfertave prej 100 milionë dollarësh nga llogaritë bankare të korporatave të El Cartel Records dhe Los Cangris. Paratë janë transferuar pa autorizimin e këngëtarit në llogaritë personale të dy grave:
“Unë gjithashtu shtoj se për rreth një vit e gjysmë, në mirëbesim, zoti Ayala (emri i vërtetë i Daddy Yankee) u kërkoi zonjave Gonzalez akses në kompanitë e tyre dhe statusin financiar të tyre. Megjithatë, kërkesa e tij u shpërfill”, tha avokati.
Ai gjithashtu theksoi se i është dhënë pak informacion për financat e biznesit të tij dhe kjo “e ka penguar atë të ketë njohuri për menaxhimin e korporatës, financat e saj dhe angazhimet që janë bërë në emër të saj dhe me markat e saj”.
“Në funksion të veprimeve të tyre të mëparshme, menaxhimit të pakujdesshëm administrativ dhe ekonomik të subjekteve dhe konkretisht tërheqjeve të paautorizuara të shumave të mëdha të parave, të cilat cënojnë stabilitetin e subjekteve dhe të drejtat e zotit Ayala, ka qenë e nevojshme për t’iu drejtuar gjykatave në kërkim të mbrojtjes”, -shtoi avokati.
Kjo është arsyeja pse Daddy Yankee vendosi të shkojë në gjykatë për të mbrojtur të drejtat e tij “kundër njerëzve të cilëve u besonte”.
