Pas videos tronditëse së shpërndarë nga gazetari Blendi Fevziu për gjendjen e këngëtares së njohur Parashqevi Simaku, ka reaguar edhe kreu i bashkisë së Kavajës Fisnik Qosja.
Në një postim në rrjetet sociale, kreu u Bashkisë së Kavajës shpreh mbështetjen për ikonën e muzikës së lehtë shqiptare.
“Parashqevi Simaku, është vajza nga Kavaja që me zërin e saj të artë ndriçonte kombin shqiptar në momentet e veta më të zymta! Ajo është një ikonë dhe një krenari e Kavajës!
Pasi pamë pamjet e transmetuara nga gazetari Blendi Fevziu, nuk më mbetet gjë tjetër veç se të lajmëroj publikisht se Bashkia Kavajë, Këshilli Bashkiak dhe i gjithë komuniteti kavajas, ka mundësinë dhe detyrën ta mbështesë siç i takon një artiste të madhe si Parashqevi Simaku si dhe të tregojë mirënjohjen më të thellë për gjithë çfarë na ka dhuruar përgjatë viteve! Kavaja është gjithmonë shtëpia e saj dhe do ta presë gjithmonë siç i takon një ikone të ndritur si ajo!” shkruan Qosja.
Këngëtarja e famshme shqiptare gjatë viteve ’80, është një emër që mbetet i paharruar për artdashësit. Ajo emigroi në SHBA në vitet ’90 dhe jetoi larg syrit të publikut.
Parashqevia jeton e vetmuar dhe me asistencë sociale. Dihej shumë pak për këtë dhe askush nuk ka folur, as miqtë apo të afërmit.
