Specialistët e Hetimit të Narkotikëve të Drejtorisë së Policisë Fier, në bashkëpunim me Forcën Operacionale, kanë arrestuar në flagrancë shtetasin Auron Çelaj, 18 vjeç, banues në Fier, pasi dyshohet se ishte i përfshirë në shitjen e lëndës narkotike cannabis sativa.
Pas një hetimi të thelluar, bazuar në inteligjencën policore, u arrit të goditej aktiviteti i tij kriminal. Gjatë kontrollit fizik, Çelaj iu gjetën dhjetëra doza të lëndës narkotike, të cilat u sekuestruan së bashku me dy celularë.
Dyshohet se i riu sigurohej me cannabis sativa dhe e shiste në lagje të ndryshme të qytetit. Policia ka nisur hetime për të identifikuar dhe kapur persona të tjerë të mundshëm të përfshirë në këtë aktivitet.
Materialet i kaluan Prokurorisë për veprime të mëtejshme./ REFORMA
