Në rrjetin e dyqaneve “KFC” në Shqipëri është shitur mish pule i infektuar me salmonelë. Alarmin për mishin e pulës me salmonelë në rrjetin “KFC” e ka lëshuar portali “RASFF” i Bashkimit Evropian, i cili bën shkëmbim informacioni në kohë reale sapo konstaton risk në zinxhirin ushqimor. Salmonela është një bakter që shkakton kontaminimin e ushqimit, ndërkohe që personat e prekur nga salmonela kanë disa simptoma midis të cilave të vjella, dhimbje koke, të dridhura, gjak në jashtëqitje dhe infeksion të zorrëve. Sa i përket njoftimit, ai është bërë në datën 8.7.2024, duke bërë me dije mishi i pulës i marinuar “KFC” me prezencë salmonele përbën risk me ndikim serioz për shëndetin e njeriut. Autoritetit Kombëtar të Ushqimit (AKU) iu dërgua një kërkesë për informacion ku u parashtruan pyetjet:
Sa ka qenë sasia e këtij produkti e importuar në vendin tonë?
Sa është sasia që u tërhoq nga tregu?
Ky institucion na bën me dije se: “Janë importuar 1535.04 kg mish pule dhe është bllokuar nga inspektorët e AKU-t vetëm 177.12 kg”.
Deri në momentin që është bërë bllokimi në dyqanet “KFC” është shitur 1357 kg mish pule me bakterin e salmonelës.
Edhe pse në faqen zyrtare “KFC” shprehet se tregon shume kujdes në përzgjedhjen e pulave dhe zinxhirin e furnizimit, nuk dihet çfarë ka ndodhur që dyqanet i kanë tregtuar për klientët mish pule me bakterin e salmonelës, i cili nga BE është cilësuar me risk serioz në shëndetin e njeriut.
Duke u nisur nga kjo situatë, rrjeti “KFC” në Shqipëri, me anë të përfaqësuesit të tyre në vend, bënë me dije se pas marrjes së informacionit kanë bërë inspektime në magazina dhe kanë asgjësuar mishin e pulës me prezencë salmonele. Edhe pse sasia e mishit të pulës me salmonele e shitur ka qenë 1357 kg përfaqësuesi i “KFC”-së në Shqipëri nuk mbajti asnjë përgjegjësi për tregtimin e një produkti që ka rrezikuar jetën e konsumatorëve. Ndërkohë ende nuk dihet se çfarë ka ndodhur me qytetarët shqiptarë dhe gjendjen e tyre shëndetësore, si pasojë e konsumimit të mishit të pulës me salmonelë. Nga ana tjetër, duke qenë se rrjeti “KFC” në Shqipëri nuk mban përgjegjësi për çfarë ka ndodhur, pyetjet që shtrohen janë: Cili është institucioni që mban përgjegjësi për një situatë të tillë? Si u fut mishi i pulës me salmonelë në vendin tonë, duke i shpëtuar kontrollit të institucioneve përgjegjëse?
