Aktori i njohur Tom Cruise ndodhet prej disa ditësh në kryeqytetin francez dhe po ndjek Lojërat Olimpike si një tjetër spektator i thjeshtë, megjithatë sipas informacioneve të publikuara pak orë më parë, ai pritet të bëjë një paraqitje mjaft mbresëlënëse në ceremoninë e mbylljes së këtij eventi të rëndësishëm sportiv.
Sipas TMZ, aktori është përgatitur prej muajsh për të performuar lëvizjet e tij në ceremoninë e 11 gushtit, e cila fillimisht do ta shohë atë në majë të Stade de France. Prej aty ai do të hidhet në sipërfaqen e stadiumit dhe ndërkohë shikuesit do të kenë mundësinë ta shohin në një video ku edhe ai do të hidhet nga avioni dhe do të ulet në tabelën e Hollywood, që ndodhet në Los Angeles.
Hollywood Reporter raporton gjithashtu se aktori do të xhironte një skenë tjetër të rrezikshme në Kaliforni për t’u transmetuar në televizionin francez si pjesë e ceremonisë së mbylljes, por nuk ishte e mundur të merrte leje për xhirimet e rrezikshme. Kjo ide i përket vetë Cruise, i cili ia propozoi Komitetit Olimpik Ndërkombëtar dhe anëtarët e tij e pranuan, pasi aktori është një mbështetës i zjarrtë i Lojërave, të cilat do t’i kombinojë me përvojën e tij nga filmat Mission Impossible.
