Një ngjarje e rëndë ka tronditur komunitetin shqiptar në Itali, pasi një 7-vjeçare, e identifikuar si Anisa Murati ka humbur jetën teksa kishte shkuar me shokët dhe shoqet në liqenin e bioparkut AcquaViva në Caraglio. Raportohet se e mitura u gjet dy metra thellë në pellgun e madh artificial. Për nxjerrjen e trupit është dashur ndërhyrja e ekipeve të emergjencës.
Sipas mediave italiane, 7-vjeçarja i ishte besuar shoqëruesve të qendrës verore të cilët kishin për detyrë monitorimin e fëmijëve. Ndaj edhe është hapur edhe një hetim për shoqëruesit mes tyre edhe një 18-vjeçar me akuzën ‘vrasje nga pakujdesia’.
Babai i vajzës duke folur për mediat ka kërkuar drejtësi dhe zbardhjen e së vërtetës në lidhje me ngjarjen. Ai ka deklaruar se vajza nuk dinte të notonte, për këtë ishin vënë në dijeni edhe mësuesit, prandaj i kishin dhënë me vete edhe krahë ndihmës.
“Ajo ishte jeta ime, pse ka vdekur në këtë mënyrë, unë kërkoj drejtësi deri në fund për këtë tragjedi”, ka thënë babai i vajzës 7 vjeçe.
