Trajneri Sylvinho u shfaq optimist për përballjen me Spanjën që e pret nesër Kombëtaren. Bashkë me kapitetin Berat Gjimshiti, dolën në një konferencë për gazetarët, ku u shprehën se Spanja e ka në ADN mbajtjen e topit, por nuk hodhën poshtë mundësinë për t’i bezdisur iberikët. Sylvinho u shpreh se formacionin e ka gati dhe se duhet punuar në fushë. Përsa i përket pezullimit të Dakut, u shpreh se energjitë nuk duhen fokusuar në atë drejtim, por në lojën që i pret nesër. Edhe Gjimshiti tha të njëjtën gjë, duke shtuar se Daku ka bërë gabim dhe ka kërkuar falje.
Pjesë nga konferenca:
Sylvinho: Spanja e ka mbajtjen e topit në ADN, ky ekip është mirë në krah, me lojtarë me cilësi. Ka shumë lojtarë të shpejtë në krah dhe qendër të mesit të fushës. Kam gjashtë muaj që i studioj, lënë pak hapësirë në mbrojtje dhe rrinë pas topit.
Çfarë do të thotë për ju kualifikimi nëse ia dilni?
Sylvinho: Është emocionuese.
Si ju duk ndeshja Spanjë – Itali, ju ishit në stadium?
Sylvinho: Po, isha me Zabaletën në stadium. I njohim kundërshtarët e grupit tonë. Është një ekip që të impresionon. De la Fuente ka bërë një ekip të mrekullueshëm. Luajnë mirë dhe kanë mbrojtje të mirë.
Jemi ende në lojë për kalimin e grupit, i lumtur?
Sylvinho: Po, patjetër që jam i kënaqur. Para disa muajsh njerëzit mund të mendonin se ekipet do na mundin me 4 ose 5 gola. Por ja ku jemi.
Futemi për barazim?
Sylvinho: Siç kam thënë më parë, në jetën time nuk kam parë një trajner që futet për barazim. Një trajner futet në fushë për të fituar, paçka se çfarë ekipi ke dhe çfarë kundërshtari ke përballë.
Si do e përgatisini ekipin këto 24 orë?
Sylvinho: Duhet të pushojmë dhe flemë mirë këto 24 orë. Ka rëndësi për ne dhe vendin tonë. Kemi punuar me zell dhe përkushim. Kemi pasur gola, ndeshje të forta dhe punë.
E kam gati formacionin.
Mungesa e Dakut dhe pezullimi?
Sylvinho: Jemi këtu për futboll, në një event brilant. Të flasim për fëmijët që do rriten duke parë këtë ndeshje. Nuk duhet të shpenzojmë energjinë për gjëra të tjera, mos ndikohemi nga kjo gjë.
Gjimshiti: Duhet të fokusohemi te ndeshja nesër, Daku ka bërë gabim dhe ka kërkuar falje. Të fokusohemi vetëm te ndeshja e nesërme. Do jetë ndeshja më e vështirë, ndoshta më e vështira në këtë grup. T’i shqetësojmë dhe të bëjmë më të mirën që dimë.
Shqipëria dhe Spanja luajnë nesër në orën 21:00 për ndeshjen e tretë dhe të fundit në Grupin B të Euro 2024.
