Valentina Lamaj, mësuesja e anglishtes dhe njëherazi zyrtarja e Drejtorisë Arsimore Rajonale Tiranë, emri i së cilës doli në skemën e mashtrimit në gjimnazin “Qemal Stafa” duke ju premtuar bursa nxënësve për në SHBA, ka thyer heshtjen për skandalin. Teksa është vënë në hetim për rastin, Lamaj e ka kaluar “topin” e përgjegjësisë tek Ministria e Arsimit.
Në postimin e saj në rrjetet sociale, ajo shkruan se përfshirja e saj dhe e gjithë mësuesve të tjerë “Let’s talk together about US 2024”, nuk ka qenë iniciativë e tyre, por e vendosur nga institucionet.
Mes justifikimeve të vazhdueshme për përfshirjen në skemën e mashtrimit, ajo shton se vetëm drejtësia mund ta zbardhë çështjen e saj, ndërsa reagimin e mbyll duke i kërkuar falje nxënësve që kanë rënë pre e mashtrimt.
REAGIMI I PLOTË:
Të dashur miq, familjarë, nxënës e prindër! E ndiej të nevojshme t’ju drejtohem me një mesazh të gjithë juve që më keni qëndruar pranë dhe jeni interesuar për mua në një moment kaq delikat e të veshtirë si ky që po kaloj. Ashtu si shumëkush nga ju që më njeh, e di që kurdoherë jam munduar të jap më të mirën time në gjithçka që lidhet me profesionin dhe veprimtarinë time si mësuese. Përgjatë gjithë rrugëtimit tim profesional, kam kryer me shumë përkushtim, ndershmëri dhe përgjegjshmëri çdo orë mësimore, detyrë apo projekt të caktuar, e kjo sepse për mua profesioni që kam zgjedhur është pasion dhe mision, e si rrjedhojë është i shenjtë. Ndaj, të gjendesha në mes të akuzave e të vorbullës mediatike pa fakte, për mua e për familjen time ka qenë shokuese e përtej surreales. Ndiej detyrimin të deklaroj se asgjë nga ato që keni lexuar, nuk është e vërtetë. Përfshirja ime dhe e të gjithë mësuesve koordinatorë në projektin “Let’s talk together about US 2024”, nuk ka qenë iniciativë e jona, por është vendosur në mënyrë kolegjiale institucionalisht. Për më shumë dhe për zbardhjen e të vërtetës, detyra i takon organeve kompetente. Shpresoj dhe kam besim se shumë shpejt do të hidhet dritë mbi çdo të pavërtetë e drejtësia do të triumfojë. Gjej shumë të rëndësishme t’u them të gjithë nxënësve pjesëmarrës në këtë të ashtuquajtur projekt, që edhe unë ashtu si ju, jam tejet e keqardhur që mundi dhe puna e gjithë këtyre muajve nuk mundi të finalizohej ashtu si të gjithë ne mendonim dhe prisnim. Në përfundim, dua të falenderoj edhe njëherë të gjithë ju që më keni mbështetur, qëndruar pranë dhe më keni besuar thjesht sepse më njihni dhe e keni kuptuar kush jam. Faleminderit!
Kujtojmë se për rastin në hetim është vënë edhe drejtoresha e gjimnazit, Klotilda
Jaupi.
Bëhet fjalë për një projekt të ashtuquajtur “Let’s Talk Together About US24”, i cili pretendohej se ishte ngritur nga zyrtarja arsimore, pjesë e Drejtorisë së Përgjithshme të Arsimit Parauniversitar në Ministrinë e Arsimit dhe Ambasadës Amerikane në Shqipëri. Por e vërteta u zbulua shumë shpejt. (lexo këtu)
Fillimisht ishte ambasada amerikane, e cila doli me një deklaratë zyrtare dhe bëri me dije se kishin zbuluar një skemë mashtrimi, duke këshilluar po ashtu qytetarët që të mos bien pre e këtyre skemave pasi nuk kanë asnjë lidhje me ta.
Pas reagimit të Ambasadës, Policia e Shtetit doli me njoftim zyrtar duke bërë me dije se shtëpia e zyrtares së arrestuar, Valentina Lamaj dhe e bashkëpunëtores së saj drejtoreshës së gjimnazit, Klotilda Jaupi ishte kontrolluar nga uniformat blu. Sipas Policisë, Lamaj së bashku me persona të tjerë kishin krijuar një rrjet mashtrimi duke falsifikuar dokumente, me pretendimin se do u jepnin të rinjve bursa për të studiuar në Shtetet e Bashkuara të Amerikës.
