Një studente e Universitetit të Prishtinës ka akuzuar profesorin e saj, Xhevat Krasniqi për ngacmim seksual. Ditën e djeshme, para se të futej për të dëshmuar para Këshillit të Etikës në Universitetin e Prishtinës, ai është përballur nga një grup studentësh që e kanë akuzuar në sy. Njëra prej tyre ka treguar historinë e saj, duke mos e shmangur dot përlotjen.
“Më ke thënë kam me t’bo masazh. Pranoje që edhe nga universitetet e tjera je larguar për ngacmim seksual…pranoje kush je! Kam pasur frikë para një viti, sot nuk kam më frikë. Më ke thanë, pranoje që më ke thënë. Në konsultime 14 shkurt 2023, më ke thënë kam për të të bërë masazh. I nxjerr edhe unë faktet e mia, edhe e shohim,” u shpreh studentja, gjatë ballafaqimit me profesorin Krasniqi, ndërkohë që kur fliste nuk i përmbajti dot lotët.
View this post on Instagram
Profesori i ka mohuar të gjitha akuzat duke thënë se nuk ka ngacmuar asnjëherë seksualisht. Sipas tij, e gjitha po bëhet për shkak se studentët nuk e kanë kaluar provimin e tij dhe kështu kanë nisur që të “shpifin” për t’i përbaltur imazhin.
Ngjarja ka shkaktuar shumë reagime në Prishtinë, pasi ka pretendime se i njëjti profesor, është larguar nga Universiteti i Gjakovës, po për të njëjtin shkak.
Ndërkohë, ditën e sotme, profesori Xhevat Krasniqi është pezulluar nga puna. Kështu ka bërë të ditur Rektorati i UP’së përmes një komunikate.
“Mbi bazën e vendimit të Këshillit të Etikës dhe rekomandimit drejtuar Rektoratit, Rektori i UP-së mori vendim për pezullimin nga puna të Prof. Xh.K., me efekt të menjëhershëm, sipas kornizës normative përkatëse, derisa të përfundojnë veprimet hetuese nga ana e prokurorisë se shtetit. Këshilli i Etikës i rekomandon Rektoratit që çështjen e referuar kundër Prof. Xh.K. ta procesojë edhe formalisht në organet e hetuesisë dhe të bashkëpunojë me to. Këshilli i Etikës i Universitetit të Prishtinës refuzon sulmet brutale nga persona brenda dhe jashtë UP-së dhe kërkon përmbajtje dhe rezervim nga çfarëdo ndërhyrje dhe sulm ndaj UP-së, sidomos nga vetë anëtarët e stafit të UP-së. Me datë 22 prill, Këshilli i Etikës është sulmuar në mënyrën më të ashpër, pa arsye dhe në baza personale nga individë, të saktësuar në Vendimin e Këshillit të Etikës, që rezulton të jenë staf i portaleve, gazetarë, përfaqësues të OJQ-ve dhe staf akademik i UP-së.”
