Nëna e të ndjerës Sibela Abedini, e cila vrau veten pasi iu publikua foto intime në krahë të Altin Çokut në TIK Tok, është shprehur se dy persona e kanë kërcënuar.
Daniela Abedini, në studion e emisionit “Me zemër të hapur” të moderatores Evis Ahmeti, u shpreh se një makinë i ka kaluar pranë dhe personi që ndodhej në mjet iu është drejtuar duke i thënë që “nëse nuk e nxjerrin vëllain nga burgu, do të marrim fëmijën peng”.
Edhe pse ka bërë denoncim në polici, nëna e Sibelës thotë se ende nuk ka marrë mbrojtje nga Policia e Shtetit.
“Një makinë kaloi pranë meje dhe më tha se brenda 24 orëve nëse nuk e nxjerrin vëllain nga burgu, shtëpinë ta dimë, e do të marrim fëmijën peng, se me laçianët nuk merret dot njeri. Shkova tek policia dhe iu thashë se kërcënimi ka ndodhur përballë shkollës “Ibrahim Rugova”.
Ai që më kërcënoi ishte i shëndoshë, me një xhup të zi dhe tullac. Shkolla është afër banesës time. Pastaj kam marrë çunin e xhajës në telefon që të më mbronte. Vajza mbante një thikë, se kishte frikë, e mbante me vete për vetëmbrojtje. Nuk më ka ndodhur asnjëherë të kërcënohem, është hera e parë që më ka ndodhur. Unë dhe fëmijët po kalojmë në trauma, kemi frikë të lëvizim”, tha nëna e Sibela Abedinit.
Sibela Abedini, nëna e një vajze 2-vjeçare i dha fund jetës mbrëmjen e 10 shkurtit. 27-vjeçarja u hodh nga tarraca e katit të katërt të pallatit ku jetonte në Kamëz, pas publikimit të një fotoje intime ku ajo duket në krevat me TikTokerin Altin Çoku.
Sibela i ka kërkuar Altinit të fshijë foton, por ai nuk e ka bërë këtë gjë, e për pasojë Sibela vrau veten. Në lidhje me ngjarjen u arrestua Altin Çoku, i cili akuzohet se ka publikuar fotografinë e tij së bashku me Sibelën në një dhomë hoteli.
