Një ngjarje e rëndë ndodhi në nëntor të vitit të kaluar, ku Liridona Ademaj, u vra nga bashkëshorti i saj Naim Murseli.
Së fundmi është zbardhur dëshmia e babait të Naimit, Shaban Murseli, i cili ka deklaruar për hetuesit e policisë se ai ka qenë në dijeni për një problem në familjen e çiftit.
Bëhet fjalë për një problem që ka ndodhur rreth një vit para ekzekutimit të Liridonës, ku Naimi ka pasur një rast me djalin e hallës së tij, K. Kokallën, vëllain e Kushtrim Kokallës, të dyshuar për përfshirje në vrasjen e Liridona Ademajt.
Shabani ka rrëfyer se për disa mesazhe të shkëmbyera mes Naimit dhe gruas së vëllat të Kushtrim Kokallës ishin bërë çështje në familjen Murseli.
Sipas tij, Naimi dhe Liridona, janë takuar me vëllain e Kushtrimit dhe bashkëshorten e tij dhe kjo çështje është mbyllur po aty, por nga ky rast janë ftohur marrëdhëniet në mes tij dhe Naimit.
‘Unë përveç një problem që e ka pas Naimi me djalin e hallës se tij K. para një viti që ka pas disa mesazhe të shkëmbyer përmes telefonit gjegjësisht me B., gruan e K.. Sipas njohurive që unë i kam pas për këtë rast nuk ka pasur diçka më shumë mes Naimit dhe B. përveç disa shkrimeve dhe fotove jointime, foto normale”, ka thënë Shaban Murseli në dëshminë e dhënë në polici më 1 dhjetor.
Mirëpo e di që Naimi me Liridonën dhe K. me B. janë marrë vesh që kjo gjë të mbyllet me kaq. Nga ky rast, Naimi i ka ftohur marrëdhëniet me në një mënyrë me mua dhe familjen. Unë për këtë rast jam njoftuar ditën e vrasjes. Më ka thirrë djali i dytë Mërgimi dhe më ka treguar për rastin ku ka qenë rreth orës 22:00 e datës 29.11.2023, dhe me ka thënë ‘babë a ke folë me Naimin se po thonë se e kanë vra Lilin’, ndërsa unë jam shokuar nga ky lajm. E kam thirrë gruan time dhe e kam pyetur se çka ka ndodhë dhe i kam treguar, pastaj pas pak jemi bërë së bashku me gruan time Sanijën, vëllain Asllanin, me gruan e tij Fatmiren dhe djalin Mërgimin jemi nisur me veturë ku kemi udhëtuar për Kosovë diku 40 orë dhe kemi mbërritur me datën 01.12.2023 në orën 06:00 në shtëpinë në fshat ku kemi takuar të gjithë familjen.’
Ai është shprehur se nuk ka mundur të pyesë askënd rreth rastit pasi vëmendja kryesore ka qenë tek varrimi, procedurat, pritja e njerëzve. Por menjëherë pas varrimit është paraqitur policia në shtëpi dhe kanë marrë Naimin për Prishtinë dhe aty një prej policëve e ka futur në një dhomë dhe i ka dhënë informacion rreth ngjarjes dhe përfshirjes së Naimit në vrasje.
‘Nuk kam mundur të pyes askënd rreth rastit, meqenëse ishim shumë të zënë me procedurën e varrimit dhe rreth pritjes së njerëzve. Pastaj pas varrimit diku reth orës 16:30 kanë ardhur disa vetura të Policisë në oborrin tonë ku e kanë marrë Naimin për Prishtinë. Ndërsa gjatë bastisjes së shtëpisë nga Policia njëri nga hetuesit e Prishtinës më ka ndarë vetëm në një dhomë ku ma ka kumtuar rastin dhe më ka njoftuar se Naimi është i përfshirë në vrasje dhe se është i arrestuar.’
Kjo ishte një ngjarje që ka tronditur shumë familjarët dhe kanë qenë në gjendje tepër të shokuar duke mos ditur se çfarë të bëjnë.
‘Nga ky njoftim kemi qenë të gjithë të tronditur shumë nga kjo dhe nuk kemi ditur as çka të bëjmë. Një problem familjar ku kanë dalë në shesh disa SMS me një të afërt. Këta SMS ia kanë dërguar bashkëshortes sime dhe kjo e ka rënduar tej mase lidhjen tonë martesore. Pas kësaj ngjarje, presioni dhe kontrolla ndaj meje është shtuar ku unë kam kërkuar ndarjen, mirëpo kategorikisht bashkëshortja nuk ka pranuar dhe në një ndejë në Malmo të Suedisë, bashkëshortja më ishte hakmarrë duke më tradhtuar me një person të huaj aty”, ka thënë ai para hetuesve.
“Këtë ngjarje unë e kam parë me sytë e mi, mirëpo nuk ia kam shprehur në asnjë moment. Kjo ngjarje sigurisht që më ka rënduar dhe ndikuar në raportin tonë. Unë si bashkëshort të gjitha kushtet ia kam plotësuar dhe kam dashur që ajo të jetë e lumtur”, ka thënë Murseli.
