Situata në ‘RTSH’ prej disa javësh ndodhet në kaos. E gjitha nisi, kur disa prej artistëve bojkotuan eventin më të madh muzikor duke u tërhequr nga gara.
Bëhet fjalë, për dy artistet, Samanta Karavella dhe Kejsi Tola të cilat u tërhoqën nga ‘Festivali i Këngës’, pak ditë pasi u shfaqën në listën e artistëve pjesëmarrës.
Pas tyre, u tërhoq edhe këngëtari Sardi Strugaj, i cili aludoi se fituesi i festivalit ishte paracaktuar. Strugaj tha se kishte dëgjuar se ky kompeticion është i shitur dhe se këtë vit, atë do ta fitojë Elsa Lila
“Kështu flitet. Unë, emrin e Anxhelës e kam ditur që në maj. Emrin e Ronelës e dija nga qershori, që e ka fituar Ronela. Vjet, Albina ka qenë e paparashikueshme. Askush nuk e ka pritur, ka qenë një festival më ndryshe. Sivjet, flitet që e ka fituar Elsa”, tha ai.
Por ‘Festivali i Këngës’, nuk është i vetmi problem në ‘RTSH’. Personazhe të tjerë të njohur kanë patur gjithashtu pakënaqësi ndaj televizionit.
Regjisorja Arnita Beqiraj brenda pak kohësh ka shkëputur bashkëpunimin me televizionin. Mes saj dhe drejtuesve të këtij institucioni, ka ndodhur një përplasje e fortë, për shkak të orareve.
Sipas ‘Panorama’, pas konflikteve, regjisorja është hequr nga puna, duke ndërprerë kështu bashkëpunimin. E gjendur në këto kushte, bëhet me dije se Arnita, ka ngritur padi ndaj këtij institucioni, ashtu edhe si ndaj drejtuesve të RTSH.
Ndërkohë edhe gazetari i njohur Bledi Strakosha nuk do të jetë më pjesë e Televizionit Publik Shqiptar. Këtë e njoftoi vetë Strakosha në një postim në ‘FB’, ku sqaroi arsyet se përse sipas tij, sot ai gjendet jashtë institucionit ku ka punuar prej vitesh.
